Manifiestu Europees ‘09

Manifiestu européu d’Unidá Nacionalista Asturiana (UNA)

Crisis sobre crisis: el cuentu de siempre n’Asturies

Estes elecciones europees tán marcaes pola crisis financiera, económica y social que ta espardiéndose per tol planeta. N’Asturies, aféctanos especialmente yá que, cuando tovía nun saliéremos de la crisis xeneral del modelu productivu asturianu nos años ochenta, provocada ente otres causes pola integración europea, cáinos enriba la nueva crisis, la mundial, que bien a añadir más paru, más precariedá, más estroza ambiental y más emigración forciada.

La traxedia social provocada pola crisis requier una rotura coles polítiques y colos dirixentes políticos que tienen que responder por ella. La crisis nun ye un castigu divinu, una calamidá impredecible, sinón el resultáu d’unes orientaciones polítiques y económiques mui concretes, que son les que siguieron les instituciones financieres y lo gobiernos del mundu desarrolláu dende los años ochenta, fuesen estos de derecha o de la presunta esquierda.

N’Europa, les comisiones europees posteriores al Tratáu de Maastricht siguieron, ensin escepción, les polítiques neolliberales y nel Reinu d’España y n’Asturies pasó igual colos gobiernos del PP y del PSOE. Toos, ensin escepción, venceyaron la medría económica y el bienestar social a la llibre circulación de capitales y empreses multinacionales, plantegando que namás l’arriquecimientu ensin llendes d’unos pocos podía facer posible la xeneración de riqueza pa la mayoría, arreblagando perriba de los derechos y les conquistes sociales de décades de llucha.

Esti ye’l balance qu’hai que facer nestes elecciones. La ciudadanía van tener la ocasión de xulgar non solo la política de la Comisión Europea, sinón tamién la de los gobiernos europeos, corresponsables d’esta situación, y ente ellos l’español de Rodríguez Zapatero y l’asturianu d’Álvarez Areces. Facé-y un votu de castigu a los que tán o tuvieron nos gobiernos que mos llevaron a esta situación ye una bona forma de facer qu’empiecen a cambiar les coses. Ye una garantía de que la crisis nun la paguen los de siempre y nun se beneficien d’ella los mesmos que la causaron.

La candidatura d’Unidá Nacionalista Asturiana fai campaña escontra una crisis que tien unos responsables concretos y que namás pue superase dexando atrás les polítiques que la causaron. Llegó la hora d’encarar el credo y l’orde neolliberales, de poner enriba la mesa l’apueste por otru modelu productivu, al serviciu de la mayoría social. Asturies lleva demasiao tiempu ensin voz, ensin que los intereses de los asturianos tenga sitiu ente les maniobres de los grandes grupos de presión, venceyaos a intereses que se sienten cómodos ente les polítiques lliberarizadores, y les que nun tiene nengún problema n’acabar coles indetidaes nacionales de los pueblos d’Europa.

UNA voz democrática, La Unión Europea de la mentira

La Unión Europea que tenemos, cola ideoloxía que la domina, nun ye una ferramienta válida al serviciu de los pueblos que la componen. Los gobiernos europeos subestimaron la crisis de la qu’empezó nos USA, crisis que fai rescamplar les llendes d’una construcción europea qu’unificó mercaos pero negóse dafechu a unificar derechos y a desendolcar polítiques comunes pa defender l’emplegu y la protección social. Los gobiernos europeos yeren conscientes que los beneficios de les entidaes financieres nun teníen equivalencia na medría de la producción; yeren conscientes de que les rentes del trabayu diben perdiendo pesu en porgüeyu de les rentes del capital; yeren conscientes que les llendes a salarios y pensiones compensábense con una espansión irresponsable del créitu pa financiar el consumu y la vivienda. Yeren conscientes de que taben xugando con fueu y nun-yos dio más.

Unidá Nacionalista Asturiana (UNA) defende que los apoyos públicos tean condicionaos, a escala de la UE, al mantenimientu de los puestos de trabayu, que los despidos preventivos han de prohibise y que la deslocalización d’empreses con capitales públicos tien de penalizase duramente. Les polítiques de creitu han d’obedecer a criterios d’interés públicu. La banca nacionalizada tien, na mayoría de los países, condiciones pa impone-y al mercáu bancariu riegles non usureres que’l sector priváu ha de siguir pa nun perder clientes. Ye en tiempu de crisis onde meyor se ve pa qué valen los dirixentes políticos. N’Europa tienen qu’espoxigar voces que reclamen una Unión Europea que de verdá apueste pola democracia, que nun intente escapar del control fidiuciario que tien d’exercer la sociedá, poro, los y les asturianos somos responsables de que la construcción europea nun se convierta nun espaciu llibre onde la mayoría social ye namás espectador d’un procesu que va influyir na so vida de manera dramática. Asturies tien d’aportar una voz democrática apostando por una opción política que crea na democracia participativa, UNA ta dimpuesta a ello. Poro, dende Unidá Nacionalista Asturiana pidimos un nuevu Tratáu Européu, fechu con criterios democráticos, ye indispensable pa que les instituciones europees respuendan a los intereses de la ciudadanía europea y y seyan quien a llanzar les polítiques que desixe la situación. Nin el Tratáu de Lisboa nin el fracasáu proyectu de Constitución Europea son un bon exemplu de lo que nun debe facese, tanto poles sos formes como polos conteníos.

Unidá Nacionalista Asturiana (UNA) defende que s’abandone’l proyectu del Tratáu de Lisboa y que se faga un nuevu Tratáu dende’l Parlamentu Européu, qu’espeye los oxetivos de la UE, los derechos civiles, sociales, ambientales y políticos de los ciudadanos, que deberá ratificase en referéndum en tolos países de la Unión. Apostamos por un auténticu procesu constituyente fechu dende criterios radicalmente democráticos.

UNA voz verde, el desafíu del desenvolvimientu sustentable

La crisis económica y social nun pue ser una sida pa nun encarar la crisis ambiental del planeta. Muncho menos, pa xustificar nuevos modelos desarrollistes que provoquen mayor estroza ambiental, como venimos padeciendo n’Asturies dende hai décades. Asturies ye víctima dende va décades de proyectos y planes enerxéticos y d’infraestructures qu’afaren la riqueza natural del país, arriendes de condenanos a sistemes productivos insostenibles llaboral y medioambientalmente. Estos planes y proyectos nun tienen el so orixe namás qu’en Madrid, col educáu y silenciosu beneplácitu d’Uviéu, sinón que la so filosofía tamién se xenera nes instituciones europees. La voz verde que plante cara a esta situción tien que salir d’Asturies, nun va venir d’otru llau, y UNA quier ser el so altavoz.

Asina, Unidá Nacionalista Asturiana (UNA) refuga cualisquier moratoria nes polítiques yá definíes pola UE en materia ambiental, y cree qu’esta ye la oportunidá pa reconvertir, cola ayuda de los fondos europeos, los sectores industriales más contaminantes, y pa movilizar recursos pa polítiques d’apoyu a industries de tresportes colectivos menos contaminantes y de reordenación urbana, con efectos inmediatos na eficiencia enerxética de los edificios y les viviendes.

UNA voz social, nueves prioridaes pa Europa

La UE que necesitamos pa dientro -con polítiques sociales que combatan la probeza, defensora de los derechos de los trabayadores, ambientalmente desixente y respetuosa de les sos diferencies culturales- ye tamién la UE que’l mundu necesita pa, solidariamente, encarar la progresión de la miseria, el desemplegu y la precariedá. Una voz social, que se sume a un coru européu en defensa de la xusticia social, tien de ser una aportación asturiana a la Unión Europea. Otra casu, ye avanzar hacia modelos que dan la marcha atrás nel tiempu de los derechos.

Unidá Nacionalista Asturiana (UNA) nun ta nin pola vuelta al proteccionismu nin pola asiatización de les condiciones llaborales n’Europa pa concurrir al comerciu internacional. Defendemos un contratu internacional que nivele perriba los derechos llaborales. Salarios mínimos, horarios máximos de trabayu, descuentos pa la seguranza social y derechu reconocíu de fuelga tienen de ser xeneralizaos en tol planeta. Por contra, los países desarrollaos han de reconoce-y a los países subdesarrollaos el derechu a protexer les sos producciones, y a financiar el costu social que compense la so apertura a los mercaos.

Unidá Nacionalista Asturiana (UNA) defende’l principiu de resolución de conflictos pola vía política y conderga les doctrines de la “guerra preventiva”, de la “guerra humanitaria” y de la “guerra enerxética”. Defendemos la salida de la OTAN de tolos países de la UE, la fin de les bases militares estranxeres en suelu européu y oponémonos a la instalación del escudu antimisiles. Apostamos por un tratáu européu de seguranza colectiva ente tolos países del continente, onde la defensa de los derechos humanos seya un criteriu fundamental.

UNA voz Asturiana, a Europa de los pueblos llibres y soberanos

La UE nun pue desixir a los demás lo que nun cumple en casa. El derechu de los pueblos a disponer de si mesmos ye la base del pensamientu democráticu y ha de ser ún de los principios rectores de la UE. Asturies tien daqué qu’aportar a la bayura cultural ya identitaria d’Europa, polo que se neceista una voz asturiana que-y dea voz a la personalidá nacional d’esti país, y que persiga, xunta les otres naciones reprimíes de la Unión Europea, el reconocimientu de los sos derechos nacionales.

Unidá Nacionalista Asturiana (UNA) defende la llibre determinación de los pueblos que componen la UE, como derechu permanente y inalienable, tien de ser una Europa de los Pueblos, onde les naciones que la componen sean soberanes y puedan decidir los sos propios determinos y rellaciones colos pueblos que componen Europa. Defendemos la igualdá de les llingües del continente y apostamos por un marcu llegal que garantice la non discriminación pol so usu.

UNA, la to voz

Asturies lleva más de venti años sufriendo les consecuencies de la llamada “converxencia europea”, que supunxo la voladura controlada de los sectores productivos que conformaben el modelu de desenrrollu que tuvo esti país per más d’un sieglu. De la UE llegaron miles de millones pa financiar un nuevu modelu productivu pero, en cuenta de facelo, la clase política asturiana, apoderada pol sucursalismu y el falsu dogma de la non intervención del Estáu na economía, marafundió les perres n’obres faraóniques que nun sirvieron pa xenerar una Asturies productiva, sinón pa caltener el modelu de monocultivu enerxéticu de gran costu ambiental -y amás agora ensin la compensación de la xeneración masiva d’empléu- y una gran rede clientelar qu’asegura un votu cautivu col que mantener indefinidamente mayoríes electorales.

De poco mos val cambiar la UE si n’Asturies siguen les coses igual. De poco val ser quien a algamar más fondos europeos si quien los xestionen son los mesmos que lleven venti años marafundiándolos. Europa como proyectu políticu namás tien sentíu, namás ye viable si ye un procesu democráticu, d’abaxo p’arriba. Pa facer Europa hai que facer Asturies, y facer Asturies ye defender los derechos y intereses de les clases populares asturianes frente al modelu sucursalista, burocráticu y clientelar que mos imponen dende los gobiernos d’Uviéu, Madrid y Bruxelles. Fai falta cambiar Asturies.

Esti ye’l nuestru compromisu.

Somos europeos, pero nun somos eurocéntricos. Queremos pa quien vive n’Europa lo mesmo que queremos pa tola población del planeta.

Somos europeos, pero nun somos eurócrates. La nuestra Europa ye la que cree na soberanía de los pueblos y negámonos a almitir la incompatibilidá ente la democracia representativa y preseos de democracia participativa a escala continental. Queremos ser lo que yá somos, europeos, pero dende la nuestra identidá como asturianos, ún de los pueblos más vieyos del continente.

Somos d’esquierda. Sabemos con quién tamos y con quién nun tamos. Tamos colos trabayadores, colos paraos, cola xente obligao a emigrar de la so tierra, coles minoríes. Los nuestros alversarios son los qu’usen les perres públiques pa facer negocios privaos, los qu’esploten a los trabayadores, los que-y nieguen a los asturianos y asturianes el derechu a gobernanos a nós mesmos.

Somos xente europeo y asturiano d’esquierda. Hasta agora los asturianos y asturianes fuimos los convidaos de piedra nuna construcción europea que tuvo grandes consecuencies pal nuestru país. Ye la hora de que se mos sienta. Ye la hora de que se sienta esa voz asturiana, social, verde y democrática. Ye la hora de da-y voz a Asturies.